إلهام شاهين تكشف حقيقة اعتزال المخرج محمد سامي -فيديو

هند منيرالخميس 20 مارس 2025 - 23:15

116 2 دقائق

كشفت الفنانة، إلهام شاهين، حقيقة اعتزال المخرج المصري، محمد سامي، التي أثارت جدلا واسعا عبر وسائل الإعلام ومنصات التواصل الإجتماعي.

وأوضحت شاهين أن محمد سامي اعتزل الدراما التلفزيونية ولم يعتزل الفن، كما أنه يستعد لإخراج فيلم عالمي في أمريكا، وذلك خلال تصريح خصت به موقع “ET بالعربي”.

وصرحت إلهام شاهين”مفيش قرار اعتزال ولا حاجة، هو مقالش كدة في البيان بتاعه، هو قال إنه مش عايز يعمل دراما”.

وتابعت قائلة “وقال إنه هيكون بره مصر، ومعلوماتي إنه هيخرج فيلم كبير في أمريكا، فيلم عالمي، فـ ربنا يوفقه ونتباهى بيه زي المخرج السوري مصطفى العقاد اللي عمل أفلام كبيرة في أمريكا، وإن شاء الله محمد سامي يوصل للعالمية ونكون فخورين بيه كمخرج مصري ناجح”.

يذكر أن محمد سامي كان قد فاجأ متابعيه بقرار اعتزاله الدراما التلفزيونية، صباح اليوم الخميس، عبر تدوينة تقاسمها على حساباته الرسمية بموقع تبادل الصور والفيديوهات أنستغرام.

وجاء في تدوينة المخرج المصري “وداعا الدراما التلفزيونية، السنه دي كانت آخر أعمالي التلفزيونية، واللي فيها بودع المسلسلات، رحلة طويلة حولي ١٥ سنة، قدمت فيهم كل اللي قدرت عليه لإسعاد الجمهور العربي ، وحققت بفضل ربنا نجاحات مع نجوم كتير و مع شركات و قنوات كلها مهمة، و كان دايما الجمهور بيشجعني، سواء بردود الأفعال أو بتصويته ليا في الجوائز، و أي نجاح حققته كان بفضل ربنا و الجمهور ، يمكن المقربين ليا عارفين إني واخد القرار ده من فترة وهو إعتزال الإخراج التلفزيوني و لكن كنت بنتهي من إلتزامات موقعة مع شركات و نجوم و الحمد لله إنتهيت منها وكان أخرها ٢٠٢٥، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي و من الوقوع في فخ التكرار و دائرة المتوقع والملل، والوحيد القادر علي الدوام هو الله وحده ، الحمد لله أخر عملين ليا إش إش و سيد الناس حققوا نجاح أنا سعيد بيه، كل يوم بلدي العظيمة مصر بتطلع صناع جداد موهوبين و مثقفين و يقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي”.

وأضاف “بشكر كل حد ساعدني في الرحلة و بشكر كل زميل منافسته كانت دافع للتميز، بعتذر عن أي مشهد قدمته أثناء الرحلة ولم يلقي إستحسان الجمهور أو إعجابهم في الأخر الفنان دايما بيجرب و الفنون جنون زي ما بيقولوا، أدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان و أجلتها كتير لحد مالقيت نفسي بكبر و خايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه و عايز يجربها بس محتاج عيلة تسانده علي إتخاذ قراره، كل التوفيق لكل زمايلي و بحبكم و بشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة”.

يذكر أن قرار محمد سامي اعتزال الدراما التلفزيونية يأتي وسط موجة من الانتقادات لأعماله الأخيرة، حيث تعرض مسلسلاه “سيد الناس” و”إش إش” لحملة انتقادات حادة عبر مواقع التواصل الاجتماعي.